திருப்தி எதிலே
மனிதா உனக்கு?
எதிலுமே இல்லை
திருப்தி உனக்கு!
மண்வீட்டில் இருக்கையிலே
கல்வீடு ஆசை!
கல்வீடு கிடைத்ததுமே
மாடமாளிகைக்கு ஆசை!
நூறுகள் சம்பாதிக்கையில்
ஆயிரம் உன்னாசை!
ஆயிரங்கள் கண்டதுமே
இலட்சம் கோடிகள் மேலாசை!
கால்கொண்டு நடக்கையிலே
இருசக்கரம் உன்னாசை!
இருசக்கரம் கிடைத்ததுமே
நாற்சக்கரத்தின் மேலாசை!
மணவாழ்வு காணாதபோது
ஒருமனைவி ஆசை!
மனைவியொருத்தி வந்தபின்னர்
மற்றபெண்களின் மேலாசை!
கூட்டத்தில் ஒருவனாயிருந்தபோது
மேடை ஏற ஆசை!
ஏறமேடை கிடைத்ததுமே
பதவியின் மேலாசை!
குழந்தையேதும் இல்லாதபோது
ஒரு குழந்தை ஆசை!
பெண்ணாக அது பிறந்துவிட்டால்
ஆண் குழந்தை ஆசை!
திருப்திஇல்லா வாழ்க்கையினாலே
மனநிம்மதி அழியும்!
மனநிம்மதி இழந்தவாழ்வில்
மரணம் ஒன்றே மிஞ்சும்!
- கவிஞர். இமாம் கவுஸ் மொய்தீன்.
தமிழோவியம்.
24-1-2008.
Subscribe to:
Post Comments (Atom)
No comments:
Post a Comment